حضرت امامِ اعظم ابو حنیفہ رضی اللہ عنہ کی بے مثال شخصیت

Article by Arooj Fatima Ashrafi

امام الآٸمہ، سراج الامہ، امام الفقہاء، صوفیِ باصفا حضرت نعمان بن ثابت رضی اللہ عنہ ایسی شخصیت کے حامل تھے کہ جن کی تعریف و توصیف میں علماء نے لکھا کہ کسی شخص میں نبوت اور صحابیت کے بعد جس قدر فضاٸل ہو سکتے ہیں وہ تمام امامِ اعظم کی ذاتِ بابرکت میں بدرجہٕ اتم موجود تھے۔
آپ نے فقہِ اسلامی کے جو قوانین و اصول متعارف کروائے ان کو امت محمدیہ نے بچشم و سر قبول کیا اور یہی وجہ ہے کہ آج دنیا بھر کے مسلمانوں کی اکثریت حنفی مسلک ہی کی پیروکار ہے۔ آپ خیر القرون میں سے قرنِ اول میں پیدا ہوٸے جس قرن کے بارے میں حضور ﷺ نے فرمایا ، اس قرن کے لوگ تمام زمانے کے لوگوں سے بہتر ہیں۔
آپ کا نام “نعمان” کنیت ابو حنیفہ تھی جس کا مطلب صاحبِ ملت حنیفہ ہے جس کا مفہوم ہے “ادیانِ باطلہ سے اعراض کر کے دینِ حق کو اختیار کرنے والا” اسی مفہوم کے تحت آپ کی کنیت ابو حنیفہ ہے۔
امامِ اعظم علیہ الرحمہ ابتداٸی اور ضروری تعلیم حاصل کرنے کے بعد تجارت کی جانب متوجہ ہوٸے۔ ایک دن اسی سلسلے میں بازار جا رہے تھے، راستے میں امام شعبی سے ملاقات ہوٸی، انہوں نے جب آپ کے چہرے کی جانب دیکھا تو چہرے پر ذہانت اور سعادت کے آثار نمایاں دیکھے۔ آپ نے امامِ اعظم سے پوچھا :”کہاں جا رہے ہو؟” بتایا : بازار جا رہا ہوں، پوچھا: علماء کی مجلس میں نہیں بیٹھتے؟ کہا، نہیں، فرمایا: “تم علماء کی مجلس میں بیٹھا کرو کیونکہ میں تمہارے چہرے پر علم و فضل کی درخشندگی کے آثار دیکھ رہا ہوں۔”
(مناقبِ امامِ اعظم ج ص ٥٩)
اس ملاقات کے بعد امام اعظم کے دل پر گہرا اثر ہوا اور آپ کو علومِ دینیہ حاصل کرنے کا شوق بیدار ہوا۔ آپ نے ابتدا میں علمِ کلام کو حاصل کیا بعد میں علمِ فقہ کی جانب متوجہ ہوٸے۔
آپ نے ایک رات خواب دیکھا کہ آپ حضور ﷺ کی قبرِ انور کھود رہے ہیں۔ تعبیرِ رٶیا کے بہت بڑے عالم امام محمد بن سیرین سے تعبیر پوچھی گٸی۔ آپ نے فرمایا ، آپ حضور ﷺ کی احادیث اور سنن سے ایسے مساٸل کا استخراج اور ایسے امور کی عقدہ کشاٸی کریں گے جو پہلے کسی نے نہیں کی ہوگی۔ اس تعبیر کو آپ نے اشارہ غیبی سمجھ کر پوری توجہ اور استغراق سے علمِ فقہ کی تحصیل شروع کی۔
(مناقبِ امامِ اعظم ج ١ ص ٦٧)
آپ نہایت ذہین و فطین اور زیرک تھے۔ آپ کے سامنے نہایت الجھے ہوٸے مساٸل پیش کٸے جاتے جن سے آپ کے معاصرین عاجز آجاتے، آپ ان مساٸل کا حل اس آسانی سے پیش فرما دیتے کہ وقت کے جید علما پکار اٹھتے کہ امامِ اعظم پر علم کے وہ راستے کشادہ کیے گٸے ہیں جن تک ہماری رساٸی نہیں۔
جس طرح علم و فضل میں کوٸی آپ کا ثانی نہ تھا اسی طرح اخلاق و کردار میں بھی آپ بے نظیر شخصیت کے حامل تھے۔
ہارون الرشید نے ایک مرتبہ امام ابو یوسف سے کہا، امام اعظم کے اوصاف بیان کریں۔ فرمایا “امامِ اعظم محارم سے اجتناب کرنے والے تھے آپ بلا علم دین میں کوٸی بات کہنے سے ڈرنے والے تھے وہ اللہ تعالی کی عبادت میں انتہاٸی مجاہدہ کرتے اہلِ دنیا کے منہ پر کبھی ان کی تعریف نہ کرتے۔ اکثر خاموش رہتے اور مساٸلِ دینیہ میں غور و فکر کرتے رہتے تھے اتنے عظیم علم کے باوجود نہایت سادہ اور منکسر المزاج تھے۔ جب کوٸی سوال پوچھا جاتا تو کتاب و سنت کی طرف رجوع کرتے اور اگر اسکی نظیر نہ ملتی تو پھر قیاس کرتے۔ نہ کسی شخص سے طمع کرتے نہ بھلاٸی کے سوا کبھی کسی کا تذکرہ کرتے۔” ہارون الرشید یہ سن کر کہنے لگا: صالحین کے اخلاق ایسے ہی ہوتے ہیں پھر اس نے کاتب کو ان اوصاف کے لکھنے کا حکم دیا اور اپنے بیٹے سے کہا : ان اوصاف کو یاد کر لو۔
(تذکرة المحدثین ص ٥٤)
یہ علم و عظمت کا آفتاب عرصہٕ دراز تک اپنی کرنوں سے سارے جہاں کو جگمگاتا رہا یہاں تک کہ آخری عمر میں خلیفہ ابو جعفر منصور کے عہدہ و منصب کی پیش کش کو قبول نہ کرنے کی پاداش میں آپ پر شاہی عتاب نازل کیا گیا اور آپ کو قید خانے میں قید کیا گیا، روایات میں آتا ہے آپ پر روزانہ کوڑے لگاٸے جاتے تھے۔ ایک دن بحالتِ سجدہ آپ کی روح اس دار الفانی سے دارالبقا کی جانب کوچ کر گٸی۔
دعا ہے ربِّ تعالی امامِ اعظم رضی اللہ عنہ کی سیرت پر ہمیں چلنے کی توفیق عطا فرماٸے اور آپ کے علم و فضل کا صدقہ ہم گنہگاروں کو بھی عطا فرماٸے۔ آمین بجاہِ نبی الامین ﷺ
تحریر: عروج فاطمہ اشرفی